UKA 2001 / 34

Peqqussutissatut siunnersuummut oqaaseqaatit

Nalinginnaasumik oqaaseqaatit

Peqqussutissatut siunnersuutip saqqummiunneqarneranut pissutaavoq inissiani attartortittakkani ineqarnermut tapit pillugit Inatsisartut peqqussutaannik UPA 2001-imi akuersinerup malitsigimmagu 1. maj 2002 aallarnerfigalugu kapitali 4 malillugu illuutillit ineqarnermut tapinik pisartagaqarunnaarnissaat.

Illuliornermut tapiissuteqartarneq pillugu Inatsisartut peqqussutaanni kapitali 5-imi imaluunniit 6-imi malittarisassat malillugit illulianik piginnittut ineqarnermut tapinik pisartagaqarnissamut periarfissaqarsimanngillat, taamaattumillu peqqussutissatut siunnersuummi ilaanatik.

Upernaakkut 2001-imi Inatsisartuni oqaatigineqarpoq illuutillit inissiani attartortittakkani ineqarnermut tapiissutit pillugit Inatsisartut peqqussutaannik aalajangiinermut atatillugu akiliutissanik akiliinissaminni tapiiffigineqarsinnaajunnaartut ineqarnermut tapit peerneqarneranut illuliornermut tapiissuteqartarneq pillugu inatsisiliornikkut annaasaminnik taarsiivigineqassasut.

Aammattaaq peqqussutissatut siunnersuut Inatsisartut upernaakkut 2001-imi ataatsimiinnerminni tapiissuteqarfigineqarlutik illuliaasartut pillugit oqallinnerisa kinguneraa, tassani Inatsisartut isumaqatigimmassuk oqilisaassiffigineqarluni taarsigassarsisarnerup ilaqutariinnut aningaasaqarnikkut artukkinneqarnerpaanut ilaqutariit aningaasatigut pisinnaasaat naapertorlugit naleqqussaasoqassasoq.

Qularnarpoq taarsigassarsisup katillugit inoqutigiit akileraarusersukkanik 128.000 kr.-it ataallugit isertitaqartartut akiitsuminnik akilersuinerminni akiitsoqalernatik taarsigassarsiaminnik akilersuisinnaanissaat. Taamaattumik naatsorsuutigineqarsinnaavoq illunik pineqartunik Namminersornerullutik Oqartussat arsaarinnittarnissaat, tassa taarsigassarsisut taakkua aningaasatigut allatut iliuuseqarluni ikiorsiivigineqanngippata.

Taamaattumik akiligassanngorsimasut taarsigassarsiallu amiakkuisa isumakkeerfigineqartarnissaannut illuatungiusinnaavoq illunik pineqartunik Nunatta Karsiata pinngitsaaliissummik arsaarinninniartarnissaa, tamatumalu malitsigisinnaallugu inoqutigiit pineqartut inissarsiuuttariaqalernerat, taarsigassarsiat naatsorsorneqartarnerisa aningaasartuuteqarfigineqartarnissaa, immaqalu akit nikerarnerisa kingunerisaanik pissarsiassaannik tunniussisariaqartassalluni, kiisalu illut igalaavisa assersorneqarnerinut nalingisalu sillimasernerannut aningaasartuuteqarsinnaalluni.

Peqqussutissatut siunnersuut KANUKOKA-mut tusarniaassutigineqarsimavoq, tassanngaaniillu peqqussutissatut siunnersuummut oqaaseqaateqanngilaq. Siunnersuut aammattaaq tusarniaassutigineqarsimavoq A/S Inissiaatileqatigiiffik INI-mut, Isumaginninnermi Suliffeqarnermilu Pisortaqarfimmut kiisalu Aningaaqarnermut Pisortaqarfimmut Akileraartarnermullu Pisortaqarfimmut.

Peqqussutissatut siunnersuutip allaffissornikkut malitsigisassai

Peqqussutissatut siunnersuusiornermi Naalakkersuisut nalunaarusiornikkut malittarissiussapput isumakkeerfigineqarnissamik qinnuteqaatinik allaffissornikkut aqutsinissaq pillugu aalajangersaanissamik, A/S Inissiaatileqatigiiffik INI ulluinnarni qinnuteqaatinik suliarinnittuusalissaaq, tassa INI-p tapiiffigineqarluni illuliortarneq aqutarereermagu. Piumasaqaataavoq INI-p pisussaaffigissagaa taarsigassarsisimasut qinnuteqaataannik pissarsiniartarnissaq.

Inatsisartut aningaasanut inatsisaanni kontomi 72.02.02-mi Sullissinissamik isumaqatigiissummi, A/S Inissiaatileqatigiiffik INI, tapiissutinik ilaatigut boligstøttip aqunneqarneranut atorneqartussanik allaffissornikkut aqutsisussaavoq. A/S Inissiaatileqatigiiffik INI-lli isumakkerfigineqarnissamik qinnuteqaatinik sullissisuunissami akiuteqaqqinnissamut piumasaqaat eqqarsaatigalugu tunuarsimaarpoq, apeqqutaatillugu qinnuteqaatinik suliaqarnerup qanoq suliakkersuutaatigiumaarnera.

Naatsorsuutigineqanngilarli INI-p boligstøtte-mik aqutsinermini suliassai tamarmiusut amerleriarumaartut, illumut akiligassanik taarsigassarsiallu amiakkuinik akilinngitsuukkanik isumakkeerfiginninnerup malitsigissammagu taamatut annertutigisumik akiligassanik akilinngitsuukkanik akiliisitsiniarnermi oqilisaanneqarneq. 2002-mi suliassat annertusiallakkallarneriarlutik ukiuni tulliuttuni taamatulli annikilleriartussaapput.

Peqqussutissatut siunnersuutip aningaasatigut kingunissai

A/S Inissiaatileqatigiiffik INI-p ilisimatitsissutigaa taarsigassarsiallit 386-it 2000-imi ineqarnermut tapinik pissarsitinneqartarsimasut Taarsigassarsiallit taakkua 2000-imi ineqarnermut tapit katillugit 4,4 mio. kr.-it pissarsiarisimavaat. Taakkua kapitali 4-mi taarsigassarsiani akiligassaasa amiakkui katillutik 98,4 mio. kr.-iupput.

Taarsigassarsiallit 386-iusut agguaqatigiissikkaanni 55%-iisa ineqarnermut tapitigut ilanngaatigereerlugit pissarsiarisarsimavaat. Nalinginnaasumik akiliutissanut tapiissutinik, meeqqanut ineqarnermut tapiissutinik ineqarnermullu tapiissutinik pissarsisarnerat isiginiassagaanni taamaallaat aningaasanngorlugit pineqavittarput akiligassat 12,7 mio. kr.-niusut 14%-ii 1,78 mio. kr.-nitut annertutigisut.

Taarsigassarsiallit 386-iusut Ineqarnermut tapinik pissarsisarvittartut maannalu tapit atorunnaartussanngornerisa kingornatigut aningaasarnermikkut ikiorserneqartussanngortut taarsigassarsiallit ineqarnermut tapinik pisartagaqartuunngitsut aningaasatigut ikiorserneqarnissartik naatsorsuutigisinnaanngilaat, kisiannili annaasaqaateqarsimanngillat ujariatsisussaanatillu. Ineqarnermullu tapinik pisartagaqarsinnaaneq atorunnaarsinneqarpat taakkua ikiorserneqarnissamik periarfissartik amigaatigilertussaavaat. Nalilerneqarpoq taarsigassarsisimasut akornanni ukiumut 40-t missaanniittut taamatut pisariaqartitsiumaartut.

Illumik kapitali 4-mik piginnittoq akiligassanik akiligassalluunniit amiakkuinik akiliisinnaajunnaartoq taarsigassarsisimanerminik atorunnaarsitsinialeruni pisinnaatitaaffigaa i Nunatta Karsianut illumik tunniussinissani, illuliornermut tapiissuteqartarnermik aaqqissuussineq naapertorlugu illumik tunniussinermi pisinnaatitaaffiit taamaattussaammata. Nunatta Karsiata aamma illut akiitsoqarfigineqartut pinngitsaaliissummik arsaarinnissutigisinnaavai.

Namminersornerullutik Oqartussat kapitali 4 naapertorlugu illuliaasunik utertitsisussaatitaanerata malitsigisussaavaa illoqartuarnissaa Namminersornerullutik Oqartussanit oqartussaaffigineqartunik, tassa allanik piginnittoqalernissaminnik utaqqisunik, imaluunniit illup suneqarnissaanik aalajangiivigisassanik, soorlu nutaamik taarsigassarsisumut pigitiligassat, Namminersornerullutik Oqartussanit attartortittaganngortinneqartussat, ammasumik tuniniagassat, kommuunimut tunniussassat imaluunniit ingutsigassat.

Isumakkeerfiginninnermut illuatungiliunneqarsinnaavoq Nunatta Karsiata illunik pineqartunik pinngitsaaliissumik arsaarinnittalernissaa, tassa piginnittunit inoqutigiittut 128.000 kr.-it ataallugit isertittagalinnit, tamatuma malitsigisassavaa inoqutigiinnik inisseeqqinniartarnissaq, taarsigassarsiat naatsorsorneqarnerinut aningaasartuuteqarnissaq, immaqalu akit allanngorarnerisa kingunerisaanik akiliuteqartariaqartarnissaq, kiisalu illut igalaavisa matoorneqartarnissaat nalingisalu sillimmarserneqartarnissaat.

Peqqussutissatut siunnersuutip aningaasatigut kingunissaasa malitsigissavaat Aningaasanut Inatsisissatut siunnersuummi allannguutissarpaalunnik siunnersuuteqarnissaq, tassalu boligstøttimi kontoni aammalu ineqarnermut tapinut kontoni, kiisalu isumaginninnermut tunngasuni ineqarnermut meeqqanut tapiissutini.

2002-mi DAU-p sunniutissai

Konto-ni pingaarnerni 72.06.01-mi aamma 72.06.02-mi isertitassaagaluanit annaasat aningaasalersorneqassapput ineqarnermut tapinit, ineqarnermut meeqqanut tapiissutinit, ernianut akilersuutinullu tapiissutinit ileqqaakkanik, kiisalu konto-mi pingaarnermi 99.72.20-mi iluarsaassinissanut immikkullu aserfallatsaaliinissanut taarsigassarsiaritittakkat annikillisinneqarnerisigut, pissutigalugu illut boligstøttimit avissaartitat aaqqissuussineq taanna malillugu taarsigassarsisinnaatitaanngimmata. Taarsiullugu periarfissaraat 10/40/50-mik sanaartorneq, konto pingaarneq 87.72.19. Tassalu 2002-mi boligstøttimik illulianik iluarsartuussinissanut aningaasaliissutissat ikilisussanngorput, ukiunili missingersuusiorfiusuni tassunga aningaasaliissutissat amerlisinneqassallutik, tak. kinguliini allassimasut.

Inissiani attartortittakkani ineqarnermut tapit pillugit Inatsisartut peqqussutaannik nr. 3-mik, 31. maj 2001-imeersumik Inatsisartut aalajangiinerisa malitsigisaanik ukiuni missingersuusiorfiusuni kap. 4 malillugu illuni piginnittut ineqarnermut tapinik pissrtagaqarsinnaanngillat. Taamaalillutik aningaasat inissiani attartortittakkani ineqarnermut tapit pillugit Inatsisartut peqqussutaannik nr. 3-mik 2001-imeersumik aalajanngiinissaq sioqqullugu siumut missingersuutigineqarsimagaluartut konto pingaarnermi 30.11.10-miittut, Ineqarnermut Tapinut, kap. 4 malillugu illulianut atorneqartussaagaluit allamut atugassanngortinneqarsinnaalissapput.

2002-mi AI-mi kontomi pingaarnermi 30.11.10-miippoq Ineqarnermut tapit, ukiumut 3,9 mio kr.inik aningaasartuutaasussatut naatsorsorneqarsimasut boligstøttemillu kapitali 4 malillugu illuutillit ineqarnermut tapiinut atorneqartussat. Taamaattumik 2002-mi aningaasaliissutit siuliani allassimasutut 2,6 mio kr.inut appartinneqarsinnaapput. 2003-imiit ukiuni tulliuttuni kontomi pingaarnermi 30.11.10-mi Ineqarnermut tapit DAU-p sunniutai pillugit 2003-2005-imut takussutissami allassimasutut 3,9 mio kr-inik appartinneqassapput.

Nalilerneqarpoq taarsigassarsiallit tamakkerlutik 1,5%-iisa missaat, inuit 2.980-it ukiumut isertitarisartagaat ima appariartigissasut, taarsigassarsiaminnik isumakkeerfigineqartariaqarlutik. Nalilerneqarpoq ukiuni missingersuusiorfiusuni tamani aningaasanik immikkoortitsisoqartarnissaa taarsigassarsiallit 40-t taarsigassarsiatigut isumakkeerfigitissutaasa nalinginut. Nalilerneqarpoq ukiuni missingersuusiorfiusuni 10 mio. kr.-inik immikkoortitsisoqartarnissaa immikkut ittumik akilersukkanut matussutissatut pisariaqartitsilersinnaanermut atugassanik.

2003, 2004 aama 2005-mi DAU-mi sunniutissat

Sinneqartoorutit 2,6 mio kr.iusut nuunneqassapput kontomut pingaarnermut 99.72.20-mut, Boligstøtte, iluarsaassinissanut immikkullu aserfallatsaaliinissanut taarsigassarsisitsinernut, taamaalillutik. Aningaasat taakku konto-mut pingaarnermut 99.72.20-mut, Boligstøtte, iluarsaassinissanut immikkullu aserfallatsaaliinissamut nuunneqassapput, tassalu ukiuni 2002-2005-imut sunniutigivissallugu konto-mi pingaarnermi 99.72.20-mi iluarsaassinissanut siumut missingersuutit 4,8 mio. kr.-ninik annertusineqarnissaat.

Peqqussutissatut siunnersuutip uuma takutippaa 2002-2005-imut ukiut tamaasa DAU-p sunniutaa 0-uussasoq.

Ukiuni missingersuusiorfiusuni pingasuni taakkunani tamani tarsigassarsiat killiffimmikkut annikillisaavigineqartassapput oqaasertat aningaasartaasigut, DAU-p inerneranut toqqaannartumik sunniuteqartussaanngitsukkut.

2002-mi Inatsisartut Aningaasanut Inatsisissaattut siunnersuummut allannguutissatut siunnersuummik Naalakkersuisut saqqummiussiniarput, taamaalilluni peqqussutissatut siunnersuutip uuma aningaasatigut kingunissai 2002-mi Aningaasanut Inatsimmi ilanngunneqarsinnaaqqullugit.

Aalajangersakkanut ataasiakkaanut oqaaseqaatit

§ 1, nr. 1-mut

Aalajangersakkami siunnersuutigineqarpoq inissialiornissamut tapiiffigineqartarneq pillugu Inatsisartut peqqussutaanni kapitali 4-mi maleruagassat malillugit illulianik piginnittut oqilisaanneqarlutik taarsigassarsiaminnik akiitsorilersimasaminnillu isumakkeerfigineqarnissamut periarfissinneqartarnissaat.

Peqqussutissatut siunnersuut marlunnut avitaavoq, siullermi ilaqutariit piffissami 1. maj 2000-imit 30. april 2002-ip tungaanut ineqarnermut tapinik pisartagaqarsimasut taamaalillutillu inoqutigiittut 128.000 kr.-it ataallugit isertitaqartarsimasut annaasaminnut taarsiiffigineqarnissaat. Peqqussutissatut siunnersuutip immikkoortuata aappaa siumut isigisuuvoq, tassani pineqarlutik ilaqutariit ukiut marluk ingerlanerini akileraartarlutik 128.000 kr.-it ataallugit isertitaqarsimanerminnik uppernarsaasinnaasut annasaminnut taarsiivigineqarnissaat.

Taarsigassarsiallit piffissami 1. maj 2000-imit 30. april 2002-mut ineqarnermut tapinik pisartagaqarsimasut isumakkeerfigineqarnissamut piginnaatitaaffeqavipput, taamaallaalli piumasarineqarluni 1. november 2002 nallertinnagu isumakkeerfigineqarnissamik qinnuteqaateqarnissaat. Taarsigassarsiallit taakku uppernarsarneqarsinnaasumik ima aningaasatigut ilungersunartorsiorsimatigissapput akiliummut tapiiffigineqartinnatik akiligassaminnik akilersuisinnaanatik. Illunut kapitali 4 malillugu sanaanut akiliummut tapiissutit peerneqarnerisa kingornagut taarsiissutissanik allanik isumaginninnikkut ikiuutissaqanngilaq, tassa illut nammineq pigineqarmata.

Peqqussutissatut siunnersuutip immikkoortuata aappaani pineqarput taarsigassarsiallit siunissami ukiuni kingullerni marlunni akileraarutit naatsorsorneqarfianni inoqutigiittut ukiumut akiligaarusigassanik 128.000 kr.-it ataallugit isertitaqartarsimasut, taamaattumillu maleruagassat atuuttut naapertorlugit ineqarnermut tapinik pisartagaqarsinnaagaluartut, akiligassanngortunik akiligassallu amiakkuinik isumakkeerfigineqarnissamik qinnuteqarsinnaatitaanissaat.

Assersuutigalugu tassaasinnaapput taarsigassarsiallit ukiumi ataatsimi kingullermi piffissarititaasumi taamaallaat ineqarnermut tapinik pissarsisimasut. Taarsiulluguli uppernarsarsinnaagunikku akileraarusigassanik ukiuni kingullerni inaarutaasumik akileraarusiiviusuni 128.000 kr.-nit ataallugit isertitaqartarsimallutik akiligassanngortunik taarsigassarsiallu amiakkuinik isumakkeerfigineqarnissaminnik qinnuteqarsinnaapput. Taarsigassarsiallit peqqussutissatut siunnersuutip ilaanik taassuminnga eqqortitsisut isumakkeerfigineqarnissamut piginnaatitaaffeqavipput, kisiannili piumasaqaatitaqartumik isumakkeerfigineqarnissaminnik qinnuteqarsinnaatitaallutik.

Piumasaqaataavoq taarsigassarsiallip ineqarniarnermini tamakkiisumik aningaasaqarnerata ilungersunarluinnarnissaa, aningaasaqarniarneratalu periarfissaqartinnagu akiitsunut taarsigassarsiallu amiakkuinut akilersuisinnaanissaa, imaluunniit illup aserfallatsaalinissaanut nutartertarnissaanulluunniit ileqqaarnissaminut periarfissaarussimassalluni.

Siunnersuutigineqarpoq akiligassanngorsimasut taarsigassarsianullu amiakkunngorsimasut isumakkeerfigineqartarnissaat pillugu qinnuteqaatinik suliarinnittarnermut Naalakkersuisut erseqqinnerusunik malittarisassiornissaat. Akiligassat amiakkuisa isumakkeerfigineqarnissaannik qinnuteqaatinik naliliisarnissami siunertarineqarpoq qinnuteqartup pigisaasa nalillit inuussutissarsiorsinnaassusiatalu naliliiffigineqartarnissaat, aammalu illup pisoqaassusiata sumiiffialu aalajangiisuutillugu tuniniarneqaruni nalingata naliliiffigineqartarnissaa.

Assersuutigalugu taarsigassarsiallip aningaasaqarniarnera taamaaginnartussanngortumik appariarpat, soorlu inuussutissarsiorsinnaajunnarsimaneratigut utoqqalineratigulluunniit, siunertaavoq isumakkeerfigineqarnissaanut aalajangiisuussasoq illup sumi inissisimanera kiisalu tuniniarneqaruni qanoq akeqarumaarnera. Naliliiniarnermi ilaatigut ilaatinneqartassapput sumiiffia illunik nioqquteqarnermi soqutiginaateqarnersoq, tassunga ilanngullugu namminersorluni taarsigassarsianit aningaasalersorneqarsinnaanersoq.

Aammattaaq taarsigassarsialimmut tunngatillugu isiginiarneqartassapput tarsigassarsialik inoqutaalu sumiiffigisaminni allamik initaarnissaminnut periarfissaqarnersut, soorlu ininik attartortakkani, utoqqarnut inissiani allaniluunniit. Assersuutigalugu Namminersornerullutik Oqartussat sumiiffinni allamik inissatigut periarfissaqanngitsuni illup tiguinnarnissaa toqqarsinnaavaat, Namminersornerullutillu Oqartussat attartortittagaannut ilanngullugu, taavalu taarsigassarsisoq attartortunngortillugu, taamaalillunilu periarfissiissutigalugu ineqarnermut tapinik qinnuteqartoqarsinnaanera.

Illuatungaatigut illu sumiiffimmiissinnaavoq tunineqarnermini akisuumik tunineqarsinnaalluni. Taamaattumik akiligassanngortut taarsigassarsiallu amiakkuisa isumakkeerfiginnissutigineqarnissaat Nunatta Karsiata soqutisaanut tulluartuunavianngilaq. Taarsigassarsialik iluaquserneqaannarsinnaavoq, akiligassat amiakkuinik isumakkeerfigineqariarluni illu tuniguniuk taavalu iluanaarutit tamaasa nammineq pillugit. Qanorluunniit pisoqassagaluarpat taarsigassarsiallit ataasiakkaat periarfissaannik nalilersuinerni Nunatta Karsiata aningaasaliissutitigut annaasinnaasai tamatigut isiginiarneqartariaqarput.

§ 2-mut

Aalajangersakkami siunnersuutigineqarpoq peqqussutissatut siunnersuutip 1. januar 2002-mi atuutsinneqalernissaa, tamatuma kingornagut qinnuteqaatinik tunniussisoqarsinnaanngorlugu aammalu qinnuteqaatinik suliarinnittoqarsinnaasunngorlugu. Isumakkeerfiginninnerli aatsaat nalunaarutigineqarsinnaalissaaq 1. maj 2002 aallarnerfigalugu, kapitali 4 malillugu taarsigassarsinikkut boligstøttimik illuliani ineqarnermut tapinik pisartagaqarnerup atorunnaarsinneqarnera ilutigalugu.